Chin Pa Vaipa Nih Fak Ngai In A Vuak

New Delhi, Global Chin News : February 23, 2014, zanlei sang suimilam 4:00PM hrawngah Pu Mang Lian Uk cu a umnak innpa vai pawl nih fak ngai in an vuak.

 

Vai Kut A Tongmi Pu Mang Lian Uk

“Pumh in ka rak ttin ah kan gate (kutka) hram i aa hrengmi Uico pathum nih an ka baoh i seh an ka timh, inn chung ah ka lut i, rian kal kaa thawh ah kan gate hram cun an ka baoh i leng chuak kho loin an ka hren, ka thin a hung tuk ve i, pakhat cu lung in a lungbik ah ka cheh i, a lu a kuai, a ngeitu a ra i, tanbo in ka lubik ah a ka tuk” tiah fahtuar Mang Lian Uk nih Globalchinnews sin ah a chim.

Vai pawl nih anmah inn hmai ah hren loin kan inn hmai ah atu a ka baohtu uico pathum hi an kan hren hnawh tawn. Baoh a hmang ngaingaimi an si.

Kan luh kan chuah hin seh in an kan zuan hnawh, an kan bauh tawn tiah a chim chap.

Pu Mang Lian Uk a lu cu hmun 5 in an tthitpiak. A tu tu vaipa nih pakhat le pakhat i hmuhthiam dingin a nawlpat caah police sin ah report tuah loin cu tin cun an daihter tthan. 

“Police sin ka report hna a si ah cun kanmah karlak ah i hmuhthiam lonak a sang chinchin lai i, hmailei keimah ca zong ah a tthat lo caah hi ti hin ka daihter rih ko” tiah Pu Uk nih a chim. 

India ram, New Delhi um Chin ralzaam hna nih Uico seh le hi bantuk buainak tete hi rak ton lengmang a si. Uico seh ruang hrim ah siizung a phanmi hi an tlawm ti lo. A luancia kum hnih ah khan Pu Thang Chum (Mah Iang pa) cu Uico sehnak ruangah siizung a rak phan i, siibawi te nih an damh khawh lo ruangah a nunnak a rak liam beh.

Note/ Global Chin News Media chungin lakmi a si.